اسلام آباد۔22 مئی(اے پی پی)وزیر اعظم محمد شہباز شریف توانائی دے شعبے اچ اصلاحات کوں حکومتی ترجیح قرار ڈیندے آکھیے جو گیس دے شعبے اچ مزید اصلاحات نال گردشی قرضے دے حجم کوں بتدریج گھٹ کر تے ختم کیتا ویسی۔ اے ڳآلھ انہاں گیس دی فراہمی و کھپت دے حوالے نال اسلام آباد اچ تھیوݨ آلے جائزہ اجلاس دی اڳواݨی کریندے آکھی۔ اجلاس اچ ملک اچ گیس دی فراہمی و کھپت تے ہک طویل مدتی جامع منصوبہ پیش کیتا گیا۔ وزیر اعظم کوں گیس سیکٹر دے مالی استحکام، طویل مدتی منصوبہ بندی اتے گورننس دے نظام دی بہتری تے بریفنگ ڈتی گئی۔ وزیر اعظم محمد شہباز شریف آکھیا جو گیس دے شعبے اچ مزید اصلاحات نال گردشی قرضے دے حجم کوں بتدریج گھٹ کر تے ختم کیتا ویسی، توانائی شعبے دیاں اصلاحات حکومت دی اولین ترجیح ہن۔ وزیر اعظم مقامی گیس دی پیداوار ودھاوݨ اتے نویں ذخائر دریافت کرݨ سانگے مختلف بلاکس دے قیام تے اطمینان کیتا۔ اجلاس اچ نائب وزیر اعظم و وزیر خارجہ اسحاق ڈار، وفاقی وزراء احد خان چیمہ، محمد اورنگزیب، علی پرویز ملک، سردار اویس خان لغاری، مشیر وزیر اعظم محمد علی، وزیر مملکت بلال اظہر کیانی اتے متعلقہ اعلی حکام شرکت کیتی۔
.jpg)
