اسلام آباد۔27جنوری(اے پی پی)وفاقی وزیر بین الصوبائی رابطہ ڈاکٹر فہمیدہ مرزا پاکستان سپورٹس کمپلیکس اسلام آباد دا دورہ کیتا۔ نصیر بندہ ہاکی سٹیڈیم اچ وفاقی وزیر بین الصوبائی رابطہ ڈاکٹر فہمیدہ مرزا جاری ترقیاتی کم دا جائزہ ڳھندے ہدایت ݙتی جو آسٹرو ٹرف وچھاوݨ دا کم چار ہفتے اچ مکمل کیتا ونڄے اتے او مارچ دے پہلے ہفتہ اچ نصیر بندہ ہاکی سٹیڈیم دا ولا دورہ کریسن۔ انہاں علامہ اقبال ہاسٹل اچ چترال ویمن فٹ بال ٹیم دی کھلاڑیاں نال وی ملاقات کیتی.وفاقی وزیر آکھیے جو جواناں آلی کار تریمتیں کھلاڑی وی ملک اچ کھیݙاں دی ترقی کیتے ٻہوں وݙا کردار ادا کریندیاں پئن۔ وفاقی وزیر حکومت ولوں تریمت کھلاڑیاں کوں ہر ممکن تعاون دی یقین دہانی کرائی۔ انہاں پاکستان سپورٹس بورڈ دے متعلقہ افسراں کوں ہدایات ݙتیاں جو جاری مختلف ترقیاتی کماں کوں ڄلدی مکمل کیتا ونڄے اتے کماں دے معیار تے کہیں قسم دا سمجھوتہ نہ کیتا ونڄے. روشن خان سکواش کمپلیکس اتے روڈہم ہال دے دورہ ویلھے وفاقی وزیر صفائی اتے بئے کماں دی تعریف کیتی۔
