اسلام آباد۔8ستمبر(اے پی پی) انٹیلیجنس ایجنسیاں دی نشاندہی تے انسانی سمگلنگ اچ ملوث بین الاقوامی گروپ وٹھیا ڳئے ۔ وفاقی وزیرداخلہ محسن نقوی دی خصوصی ہدایت تے ایف آئی اے لاہور سرکل دی انٹیلیجنس ایجنسی دی معلومات تے کامیاب کارروائی کیتی ڳئی تے انسانی سمگلنگ اچ ملوث بین الاقوامی نیٹ ورک رنڳے ہتھوں وٹھیا ڳئے ، اے نیٹ ورک سادی عوام کوں ٻاہرلے ملک روزگار دے جھانسے ݙے تے لٹݨ اچ ملوث ہئی تے سادی عوام توں کروڑاں روپے ڳھدے ہن ۔ اے گروپ نقلی دستاویزات دی تیاری اچ مہارت رکھیندا ہئی تے انسانی سمگلنگ دے گروپ دا آپݨا پرنٹنگ پریس ہئی، پرنٹنگ پریس اچ کئی ملکاں دی نقلی دستاویزات تیار کیتیاں ویندیاں ہن ۔ مختلف ملکاں اچ سیاسی پناہ گھنݨ آلے لوک وی ایں گروپ توں تعاون گھندے رہیے ، تفتیش اچ نیٹ ورک دا انٹرنیشنل ڈنکی گروپاں نال وی رابطے دا انکشاف تھئے ایں مجرمانہ سرگرمیاں اچ بھارتی اتے افغانی باشندے ملوث ہن۔ دورانِ تفتیش پاکستان کوں بدنام کرݨ دی بھارتی سازش وی نشابر تھئی ۔ نقلی نیٹ ورکس دے خلاف کریک ڈاؤن پاکستانی اداریں تے بین الاقوامی اعتماد کوں تقویت ݙیوݨ دا باعث اے ۔ تفتیش دا دائرہ کار وسیع کرݙتا ڳئے تے مزید گرفتاریاں تھیسن ۔ تفتیش توں بعد ملزماں دے خلاف سخت قانونی کارروائی تھیسی۔ گرفتاریاں دے بعد کئی پاکستانی آپݨا سرمایہ اتے عزت ونڄاوݨ توں بچ ڳئن ، ایں وݙے نیٹ ورک دا قانون دی وٹھ اچ آوݨ انسانی سمگلنگ دے خلاف جنگ اچ قانون نافذ کرݨ آلے اداریں دی اہم کامیابی اے ۔ وفاقی وزیرداخلہ محسن نقوی انسانی سمگلنگ اچ ملوث بین الاقوامی گروپ کوں قانون دی وٹھ اچ گھن آوݨ تے انٹیلیجنس ایجنسی اتے ایف آئی اے لاہور کوں شاباش ݙتی اے تے آکھیے اے کامیاب آپریشن انسانی سمگلنگ دے خلاف پاکستان دی کارروائیاں اچ ھک اہم سنگ میل اے۔ انٹیلیجنس ایجنسی دی معلومات تے ایف آئی اے لاہور کامیاب آپریشن کیتے جیں تے مبارخ ݙینداں، انسانی سمگلنگ روکݨ دے ایں طرز تے مزید آپریشن جاری رکھیے ویسن ، انھاں آکھیے جو انسانی سمگلنگ مکاوݨ سانڳے چھیکڑی حد تئیں ویسوں تے انسانی سمگلنگ اچ ملوث مافیا نال اوکھے ہتھاں نال نبݨیا ویسی۔
