اسلام آباد۔12دسمبر(اے پی پی) وفاقی وزیر خزانہ اسحاق ڈار آکھیے جو ملک دے دیوالیہ تھیوݨ متعلق کوڑیاں خبراں کھنڈائیاں ویندیاں پئن ۔ ایں قسم دا منفی پروپیگنڈہ عمران نیازی کریندے پن جنہاں بارودی سرنگاں وچھا تے ملکی معیشت دا ٻیڑہ غرق کیتے اتے عالمی مالیاتی اداریں نال کیتے ڳئے وعدے پورے نی کیتے ، موجودہ اتحادی حکومت ملکی معیشت دی بہتری کیتے اہم فیصلے کیتن ، پاکستان توں کݨک ، کھاد اتے ڈالر دی سمگلنگ روکݨ کیتے سارے ضروری اقدامات چاتے ویسن ۔ اے ڳالھ انہاں سنوارکوں وزیراعظم محمد شہباز شریف اتے کابینہ دے ٻئے ارکان دے رلے پریس کانفرنس دے دوران صحافیاں دے سوالاں دے جواب ݙیندے ہوئیں آکھی اے ۔ پاکستان دی معاشی صورتحال دا جائزہ پیش کریندے ہوئیں انہاں آکھیے جو اساں سیاست دی بجائے ریاست کوں ترجیح ݙتی ، سیلاب دی قدرتی آفت آڳئی محدود وسائل دےباوجود متاثرین کوں ریلیف ݙتا، ہرہفتے کابینہ دا اجلاس تھیندے ، وزیراعظم کابینہ اچ مشاورت نال فیصلے کریندن ، اڄ اساں تحریک انصاف دی کارکردگی دی وجہ توں اتھاں کھڑوں۔ وفاقی وزیر خزانہ اسحاق ڈار آکھیے جو پاکستان توں امریکی ڈالر تے کݨک سمگل کیتی ویندی پئی اے جیں کوں روکݨ کیتے ایکشن ڳھدا ویسی ، پی ٹی آئی حکومت آپݨے دور حکومت اچ ملکی معیشت کوں تباہ کیتا، عمران نیازی عالمی مالیاتی اداریں نال کیتے ڳئے وعدے پورے نی کیتے ۔ اسحاق ڈار آکھیے ڈالر دا سرکاری ریٹ 224 روپے دے لڳ بھڳ اے تاں جو بارڈر دے ذریعے سمگل تھیوݨ دی وجہ توں گرے مارکیٹ اچ ڈالر دی قیمت اچ 13توں 18 روپے دا فرق اے، سمگلنگ دے خلاف سخت ایکشن گھنسوں ۔ انہاں آکھیے کݨک ، کھاد درآمد کریندے پیوں ، او وی سمگل تھیندی پئی اے ، لہٰذا بارڈر سیل کرݨا وی پوسی تاں کرݙیسوں لیکن ہݨ سمگل نہ تھیوݨ ݙیسوں ۔ جمعہ دے ݙینھ توں ھک کریک ڈاؤن شروع تھی چکے جیں دے وختی نتیجے سامݨے آسن ۔وزیر خزانہ آکھیے ن لیگ دی حکومت جݙاں ختم تھئی تاں مہانگ 4.5 فیصد ہئی، اوں ویلھے اسٹاک ایکسچینج ایشیا اچ ساریں توں تکھے ودھدی پئی ہئی تاں جو عمران حکومت آپݨے دور اچ ریکارڈ قرضے ڳھدے تے معیشت کوں تباہ کرݙتا۔اسحاق ڈار آکھیے پاکستان کݙاہیں دیوالیہ نہ تھیسی۔
