اسلام آباد۔29نومبر(اے پی پی)وزیراعظم عمران خان آکھیے جو کہیں ملک اچ کرپٹ لیڈر توں وݙا کوئی عذاب نئیں ہوندا، کرپشن کوں برائی نہ سمڄھݨ ہی اصل مسلہ اے، ملک اچ انصاف اتے میرٹ دا نظام ڳھن آوݨ ہی مقصد اے۔ اے ڳالھ انہاں جہلم اچ القادر ہسپتال دا افتتاح کرݨ ویلھے تقریب نال خطاب اچ آکھی۔ انہاں آکھیا جو لیڈر کݙاھیں وی اپݨے رشتہ دار اہم عہدیاں تے نئیں ٻلھیندا، ڄݙاں کرپشن کوں برائی نہ سمجھیا ونڄے تاں معاشرے اچ کون محنت کریسی؟ ایندے نال معاشرے تباہ تھیندن، اخلاقیات ہی معاشرے دی ترقی دا رستہ اے، لاہور اچ ہک سیمینار تھئے جیندے اچ سپریم کورٹ دے ججز دے نال نال اوں ڄݨے کوں وی سݙیا ڳئے ڄیڑھا ملک دا پیسہ چوری کر تے مفرور اتے سزا یافتہ اے، میں سیاست اچ تبدیلی کیتے آیاں۔ انہاں آکھیا جو ملک اچ ساݙا تعلیمی نظام ہی ساݙی کامیابی اچ رکاوٹ اے جیندے نال مسلے ودھین، تعلیمی نظام ہکو سواں ہوݨا چاہیدے جیندے نال غریب کوں فیدہ ملسی۔ انہاں آکھیا جو ذہنی غلامی جسمانی غلامی توں ٻہوں بری اے، عظیم قوم ٻݨݨ کیتے عظیم کردار ہووݨے چاہیدن، سچ اتے انصاف دے بغیر کوئی وݙا لیڈر نئیں ٻݨ سڳدا، ملک اچ مغربی ثقافت دا غلبہ مسلہ ٻݨدا پئے، پاکستان اسلام دے سنیہے کیتے پورے ڄڳ اچ اڳونہا کردار ادا کیتے۔ وزیراعظم آکھیا جو اساں ہک اینڄھی قوم ٻݨݨے ڄیڑھی ساݙے اعمال اتے نبی کریم ﷺ دی سیرت کوں جوڑے، ڄے تئیں اساں اپݨے اعمال کوں حضرت محمدﷺ دی تعلیمات نال نہ ڄڑیسوں او تئیں عظیم قوم نسے ٻݨ سڳدے۔
