اسلام آباد۔11اگست(اے پی پی) عدالت عظمیٰ سپریم کورٹ ریویو آف ججمنٹس اینڈ آرڈرز ایکٹ 2023ء کوں کالعدم قرارݙے ݙتے ۔ چیف جسٹس آف پاکستان جسٹس عمر عطاء بندیال دی سربراہی اچ جسٹس اعجاز الاحسن اتے جسٹس منیب اختر تے مشتمل ترائے رکنی بنچ 87 ورقیں تے مشتمل متفقہ فیصلہ سݨائے ۔عدالت سپریم کورٹ ریویو آف ججمنٹس اینڈ آرڈرز ایکٹ 2023ء کوں آئین دے خلاف قرار ݙیندے ہوئیں آکھیے تفصیلی وجوہات بعد اچ جاری کیتیاں ویسن ۔ سپریم کورٹ دے متفقہ فیصلے اچ آکھیا ڳئے جو پارلیمان ایجھی قانون سازی دا اختیار نی رکھیندی ۔ واضح رہے جو جسٹس منیب اختر دا اضافی نوٹ وی متفقہ فیصلے دا حصہ اے۔ سپریم کورٹ ریویو آف ججمنٹس اینڈ آرڈرز ایکٹ دے خلاف دائر درخواستاں تے چیف جسٹس عمرعطاء بندیال، جسٹس اعجاز الاحسن اتے جسٹس منیب اختر تے مشتمل بنچ چھی سماعتاں کرݨ دے بعد 19 جون 2023ء کوں فیصلہ محفوظ کیتا ہئی ۔
