راولپنڈی۔10جولائی(اے پی پی) انسداد دہشت گردی دے حوالے نال پاک امریکہ انفنٹری رائفل کمپنی مشق 2024 مُک ڳئی اے جیندے اچ ݙوہیں پیشہ ورانہ فوجاں دی انفنٹری رائفل کمپنی جوش تے جذبے نال حصہ ڳھدا۔ آئی ایس پی آر توں جاری پریس ریلیز موجب پاک امریکہ انفنٹری رائفل کمپنی مشق 2024 دی چھیکڑی تقریب نیشنل کائونٹر ٹیررازم سینٹر پبی اچ تھئی۔پاکستان تے امریکہ وچال “انفنٹری رائفل کمپنی مشق 2024” پہلی واری انسداد دہشت گردی دے شعبے اچ کرائی ڳئی ۔ ݙو ہفتے دیاں مشقاں 29 جون 2024 کوں نیشنل کائونٹر ٹیررازم سینٹر (این سی ٹی سی) پبی اچ شروع تھئیاں ۔ ݙوہیں پیشہ ورانہ فوجاں اچوں ہرھک کمپنی جوش تے جذبے نال حصہ ڳھدا ۔جنرل آفیسر کمانڈنگ 17 ڈویژن چھیکڑی تقریب اچ بطور مہمان خصوصی شرکت کیتی۔ امریکی فوج دے 34 انفنٹری ڈویژن دے کمانڈنگ جنرل میجر جنرل چارلس جی کیمپر وی چھیکڑی تقریب اچ شرکت کیتی ۔ شرکاء طرز عمل ویلھے پیشہ ورانہ مہارت دے اعلی ٰ ترین معیار دا مظاہرہ کیتے۔انفنٹری رائفل کمپنی ایکسچینج دا مقصد مشقاں دے طریقہ کار کوں چنڳاں بݨاوݨ دے علاوہ ݙوہیں ملکاں کوں پیش آندی دہشت گردی دے پراݨے خطرے دا مقابلہ کرݨ سانڳے اہم انسداد دہشت گردی دے تجربے دا تبادلہ کرݨا ہئی۔ ایں دائرہ کار اچ انفرادی تے اجتماعی سطح تے مہارت گھنݨ دے علاوہ اربن وار فیئر اچ شامل مارک مین شپ دی مہارت نال ٹیکٹیکل مہارتاں گھنݨ تے وی زیادہ زور ݙتا ڳیا۔
