اسلام آباد۔18نومبر (اے پی پی) وزیر خارجہ بلاول بھٹو زرداری آکھیا جو ملک دی خارجہ پالیسی دی بہتری کیتے کم کریندے پیوں، پاکستان امریکہ نال برابری تے تعلقات چاہندے۔ سارے ملکاں نال مضبوط تعلقات نال عوام اتے ملک دی چنڳائی کیتے کم کرسڳدوں۔ اساݙی توجہ پاکستان دے فائدے کوں اُتے رکھݨ اے۔ گزرل پنج چھی مہینےدی خارجہ پالیسیاں نال ملک دا فائدہ تھیے۔ امریکہ نال معاشی اتے تجارتی تعلقات ودھاوݨ چاہندوں۔ ماضی دی غلطیاں توں سبق سکھ تے اڳوں ودھݨا پوسی۔ متفقہ طور دہشت گردی دے خلافجنگ دا لائحہ عمل ٻݨائے اتے کاماب تھیے۔ اے ڳالھیں انہاں جمعے کوں دفتر خارجہ اچ پریس کانفرنس توں خطاب کریندیں ہوئیں آکھی۔ بلاول بھٹو زرداری آکھیا جو امریکی سازش دے بیانہ تے عمران خان یو ٹرن ڳھن ڳھدے۔ عمران خان دے اڄوکے یوٹرن کوں خوش آمدید آکھدوں۔ انہاں آکھیا جو عہدہ سنبھالیا تاں ٻہوں چیلنجز ہن، پاک امریکا رابطے اچ ڳھٹکی پاروں ݙوہیں ملکاں اچ مسئلے ٻݨدن۔ پاکستان اتے امریکا وچال تاریخی تعلقات ہن۔ انہاں آکھیا جو اساݙی بہترین پالیسیاں پاروں پاکستان دی یورپ اچ برآمدات 80 فیصد ودھین۔ اقوام متحدہ دی جنرل اسمبلی دا اجلاس پاکستان کیتے کامیاب رہیے۔ شنگھائی تعاون تنظیم (ایس سی او) اجلاس اچ پاکستان ٻہوں کامیابیاں حاصل کیتن۔ وزیر خارجہ دا منصب سنبھالݨ دے بعد چینی ہم منصب نال ڳالھ مہاڑ تھئی۔ دہشت گردی، معاشی اتے سیاسی معاملیاں تے چین دے وزیرخارجہ نال ڳالھ تھی اے۔ چینی وزیر خارجہ اتے ٻے حکام نال ملاقات دے بعد اساں سدھے پاسے ویندے پیوں۔ وزیر خارجہ بلاول بھٹو زرداری آکھیا جو چھل پاروں کجھ یورپی ملکاں دا دورہ منسوخ کیتے۔ افریقی ملکاں نال وی کم کرݨ دی گنجائش اے۔ افغانستان بارے ماضی دی غلطیاں نی کرݨی چاہیدی۔ افغانستان دی عبوری حکومت دنیا نال کیتے ڳے وعدے پورے کرے اتے عالمی برادری کوں افغانستان نال انگیج تھیوݨا چاہیدے۔ پاکستان فیٹف دے سارے ایکشن پلان تے عمل کیتے جیڑھے ملک پاکستان کوں گرے لسٹ توں ہٹاوݨ دی مخالفت کریندے ہن انہاں گرے لسٹ توں نکلݨ تے زور ݙتا۔ اساں کوشش کریسوں جو پاکستان وی فیٹف دا حصہ ٻݨے۔
