اسلام آباد۔26اپریل (اے پی پی):وفاقی وزیر مذہبی امور سینیٹر محمد طلحہٰ محمود وزارت مذہبی امور کوں ہدایت کیتی اے جو حج انتظامات کوں وختی مکمل کرݨ کیتے ݙینھ رات کم کرݨا ہوسی ، حجاج کوں سہولتاں دی فراہمی دے حوالے نال کوئی سمجھوتہ نہ کیتا ویسی ۔ ٻدھ کوں وزارت مذہبی امور اچ آپݨی زیر صدارت تھیوݨ آلے حج انتظامات تے ڳالھ مہاڑ کریندے ہوئیں انہاں حج انتظامات دے حوالے نال آپݨے اڄوکے دورہ سعودی عرب اچ تھیوݨ آلیاں ملاقاتاں بارے اجلاس کوں ݙسایا ۔ انہاں آکھیے حاجیاں کوں سہولتاں ݙیوݨ تے کوئی سمجھوتہ نہ تھیسی تے حجاز مقدس اچ پاکستانی عازمین حج کیتے انتظامات کوں چنڳے انداز اچ چھیکڑی شکل ݙیوݨ چاہندوں۔ انہاں وزارت مذہبی امور کوں ہدایت کیتی جو حج انتظامات دی وختی تکمیل کیتے ݙینھ رات کم کرݨا ہوسی ۔ ایں توں پہلے وفاقی وزیر مذہبی امور سینیٹر محمد طلحہٰ محمود دی زیر صدارت تھیوݨ آلے حج انتظامات تےبریفنگ ݙیندے ہوئیں سیکرٹری مذہبی امور آکھیے فریضہ حج دی ادائیگی کیتے عازمین کوں حجاز مقدس روانہ کرݨ کیتے حج انتظامات تے تکھے پیش قدمی جاری اے ۔ حجاج کرام دی بائیو میٹرک 28 اپریل تئیں مکمل تھیسی ۔ عازمین توں انہاں دے کار آمد پاسپورٹ وی 28 اپریل تئیں منگیے ڳئن ۔ انہاں آکھیے ملک دے سارے 10 حاجی کیمپاں دے زیر انتظام مناسک حج اتے انتظامی امور دی تربیت دا آغاز جمعرات 27 اپریل توں شروع تھیسی ۔ انہاں آکھیے تحصیل تے ضلع دی سطح تے منعقدہ حج تربیت اچ شرکت سارے عازمین حج تے لازمی اے۔ انہاں بریفنگ اچ ݙسایا جو توقع ہے جو 20 مئی توں حج پروازاں دا آغازتھیسی پاکستان توں آخری حج پرواز 21 جون کوں روانہ تھیسی ۔
