اسلام آباد۔13جنوری(اے پی پی) وفاقی وزیر خزانہ و محصولات سینیٹر محمد اورنگزیب آکھیے پاکستان جاری سال اچ یوان پرمبنی بانڈ جاری کریندا پئے ، جاری مالی سال اچ مجموعی قومی پیداواراچ 3.5 فیصد دی نمو دا امکان اے۔انہاں اے ڳالھ بلوم برگ کوں انٹرویو ݙیندے آکھی ۔ وزیر خزانہ آکھیے مالیات دے حصول سانڳے جاری مالی سال دے دوران پاکستان چینی کرنسی یوان تے مبنی ڈالر بانڈ جاری کریندا پئے، آوݨ آلے چھی توں 9 مہینے دی مدت اچ چینی سرمایہ کاراں توں 200 توں گھن تے 250 ملین ڈالر دی سرمایہ کاری حاصل کرݨ دی منصوبہ بندی اے۔ انہاں آکھیے بین الاقوامی مالیاتی فنڈ نال پروگرام اچ طے کیتی ڳئی شرطاں دے حصول اچ پرعزم ہن۔وزیر خزانہ آکھیے گزریل 50 سالاں اچ پاکستان قرضہ دے 25 پروگرام کر چکیے ، قرضے دی ایں چکر مکاوݨ سانڳے اساکوں توانائی، ٹیکس محصولات دے حصول اتے ریاستی ملکیتی اداریں دی بہتری سودھے کلیدی شعبیں اچ اصلاحات دا عمل اڳوں ودھاوݨا ہوسی ،۔ انہاں آکھیے جاری مالی سال دے اختتام تے جی ڈی پی دی شرح نمو 3.5 فیصد تئیں رہݨ دا امکان اے ، گزریل سال جی ڈی پی دی شرح نمو 2.5 فیصد ہئی ۔وزیر خزانہ آکھیے ملکی برآمدات، ترسیلات زر اتے زرمبادلہ دے ذخیرے اچ ودھارا تھئے ، کلی معیشت دی صورتحال مستحکم اے، ہݨ اساکوں پائیدار نمو تے آپݨی توجہ مرکوز کرݨی اے ، اساکوں معیشت دے ڈی این اے کوں بدالݨا اے ،معیشت کوں برآمدات تے مبنی نمو دی بنیاد تے استوار کرݨ تے توجہ ݙیندے پیوں۔
